पालघर : पालघर जिल्हा परिषदेत मुख्य कार्यकारी अधिकारी निधी चौधरी यांच्या दालनात ‘कॉफी विथ सीईओ’ हा कार्यक्रम नुकताच झाला. स्वच्छ भारत मिशनअंतर्गत ग्रामपंचायतींना हागणदारीमुक्त करण्यात सहकार्य करणाऱ्या व उलेखनीय कार्य करणाऱ्यांना मुख्य कार्यकारी अधिकाऱ्यांच्या हस्ते या कार्यक्रमांतर्गत मेडल देऊन गौरविण्यात येते.
या वेळी डहाणू येथील निकने ग्रामपंचायतीच्या सरपंच दुबळा यांना मुख्य कार्यकारी अधिकारी यांच्या हस्ते मेडल देऊन गौरविण्यात आले. विक्रमगड तालुक्यातील बंगारचोळे जिल्हा परिषद शाळेच्या शिक्षक व विद्यार्थ्यांचा स्वच्छता मेडल देऊन गौरव करण्यात आला. येथील शिक्षकांनी २०० ते २५० शौचालयांची आखणी विद्यार्थ्यांसोबत केली. तसेच स्वखर्चातून शाळेची रंगरंगोटी केली व शाळेचे रूप बदलले. पिण्याच्या पाण्यासाठी बोअरवेल खोदून नळाची सुविधा व हात धुण्यासाठी विशेष जागा केली. पालघर तालुक्यातील दातविरे ग्रामपंचायतीला स्वच्छता मेडल देऊन गौरविण्यात आले. या वेळी सरपंच, ग्रामसेवक आणि ग्रामपंचायत सदस्य उपस्थित होते.
